Maige: Wananchi walifukiwa wakiwa hai mgodi wa Bulyanhulu

tiko tiko

Mbunge wa Msalala (CCM), Ezekiel Maige. 

Mbunge wa Msalala (CCM), Ezekiel Maige, amesema kuna watu walifukiwa wakiwa hai wakati wa uanzishaji wa mgodi wa dhahabu wa Bulyanhulu mkoani Shinyanga.

Mbunge huyo alitoa kauli hiyo bungeni leo alipokuwa akiuliza swali la nyongeza. Maige alihoji serikali inasemaje kuhusu kuwalipa fidia ndugu wa watu hao.

Akijibu swali hilo, Naibu Waziri wa Nishati na Madini, Charles Kitwanga alisema yeye alikuwa ni mmoja wa watu waliokuwa wakichimba madini katika eneo hilo kati ya mwaka 1984 na 1985.

Alitaka mbunge huyo kupeleka ushahidi kwake ambao ni tofauti na ushahidi ambao wamewahi kupokea awali.

Katika swali la msingi, Maige alihoji ni hatua gani wamefikia katika kufanyia kazi maombi ya wananchi waliokuwepo kabla ya kuanzishwa kwa mgodi huo ya kulipwa fidia na mali.

Akijibu swali hilo, Kitwanga, alisema wakati wa kuanzishwa kwa mgodi huo hakuna kaya yoyote iliyostahili kulipwa fidia kwasababu hakuna mtu aliyefukuzwa katika kijiji cha Kakola ambako ndiko makazi rasmi ya watu.

“Iwapo mgodi unahitaji kutumia eneo la kijiji hicho ungelazimika kufidia wananchi wote ambao wangetakiwa kupisha ujenzi wa mgodi kulingana na sheria za nchi,”alisema.

tiko tiko

Irene Mchokozi

Filed Under: HABARI