Yanga wataka Kaburu ajiuzuru

tiko tiko

Makamu wa Rais wa Simba, Geofrey Nyange ‘Kaburu’.

Mohammed Mdose na Khadija Mngwai
Dar es Salaam
KLABU ya Yanga imehoji juu ya uwepo wa kiongozi mmoja ndani ya Bodi ya Ligi huku akiwa na wadhifa mwingine kwenye klabu pamoja na Shirikisho la Soka Tanzania (TFF) na kusema kuwa hiyo ni moja ya kulifanya soka letu lizidi kudorora.

Japo Yanga hawakumtaja moja kwa moja  kiongozi huyo, lakini habari zinadai kuwa kiongozi huyo ni Makamu wa Rais wa Simba, Geofrey Nyange ‘Kaburu’ ambaye pia ni Mjumbe wa Kamati ya Utendaji ya TFF pamoja na Mjumbe wa Kamati ya Kujadili Matukio ya Ligi.

Akizungumza na Championi Jumatano, Mkuu wa Kitengo cha Habari na Mawasiliano wa Yanga, Jerry Muro alisema kuwa Yanga inashangaa kumuona kiongozi huyo akiwa na ‘kofia tatu’ kwenye taasisi kubwa za soka hapa nchini kitu ambacho hakifanyiki popote pale duniani.

Alisema kuwa uwepo wa kiongozi huyo pamoja na viongozi wengine ambao hawana sifa za kuliongoza soka la Tanzania ni bora wawaachie wenye sifa ili soka letu likue.

“Hatuna imani na Bodi ya Ligi kwa jinsi inavyoendeshwa, umeona wapi kiongozi mmoja ana vyeo vitatu tofauti ndani ya TFF, Bodi ya Ligi, TFF pamoja na klabu? Bora wawaachie wengine ambao wana vigezo vya kukaa kwenye chombo hicho na siyo wao, lazima tuhoji vigezo vilivyowafanya wapewe nafasi hizo tunafikiri siyo sawa kwa mtu huyo kuwa na vyeo hivyo,” alifafanua Muro wakati wa mkutano na waadishi wa habari jijini jana.

Yanga chini ya Mwenyekiti wake Yusuf Manji na Makamu Clement Sanga, imekuwa ni timu yenye msimamo mkali sana pale inapoona kuwa hakuna haki kwenye jambo fulani.

Yanga imekuwa ikiamini kuwa kiongozi huyo ambaye ana nguvu kubwa amekuwa akitumia cheo chake kuvuruga baadhi ya mambo ili kuona Yanga hawapati haki yao hivyo wanataka aachie baadhi ya nyadhifa zake ili haki ipatikane kwenye maamuzi ya kamati hizo.Hata hivyo, Championi lilifanya jitihada za kumtafuta kiongozi huyo lakini ziligonga mwamba.

JIUNGE NA MICHEZO KIGANJANI TUMA NENO SPORTS KWENDA NAMBA 15778

TOA MAONI YAKO HAPO CHINI KUHUSU HABARI HII

tiko tiko

Irene Mchokozi

Filed Under: MICHEZO