Matokeo ya ligi kuu ya England leo.

tiko tiko

Ligi kuu ya soka nchini England imeendelea hii leo kwa michezo kumi iliyopigwa kwenye viwanja kadhaa nchini humo.

Ukiachana na mchezo wa Manchester United uliofanyika mapema ambapo mashetani hao wekundu walishikwa shati na Stoke City , mwanzo wa mwaka haukuwa mzuri kwa timu kubwa baada ya timu mbili za London ambazo ni Chelsea na Arsenal kufungwa kwenye michezo yake .

Chelsea wakiwa wageni wa Tottenham Hotspurs huko White Hart Lane walipoteza mchezo wao kwa kufungwa 5-3 katika mchezo ambao ulijaa magoli tangu mwanzo .

Mshambuliaji wa kimataifa wa Hispania Diego Costa alikuwa wa kwanza kuifungia timu yake mapema kwenye dakika 18 baada ya kumalizia mpira wa shuti uliopigwa na Oscar na kugonga mwamba .

Diego Costa akiifungia Chelsea bao la kwanza .

Spurs walisawazisha bao hilo kwenye dakika ya 30 mfungaji akiwa mshambuliaji kijana Harry Kane aliyefunga kwa shuti la umbali wa karibu mita 25 baada ya kumpita Oscar . Baada ya Hapo Spurs walipata bao la pili kupitia kwa beki wa kushoto Danny Rose ambaye alimalizia mpira wa Nacer Chadli uliogonga mwamba .

Winger Andros Townsend alifunga bao la tatu kwa mkwaju wa penati baada ya beki Gary Cahill kumchezea vibaya Danny Rose ,  Spurs walipata bao la nne kupitia kwa Harry Kane kabla ya kumalizia karamu kwa bao safi la Nacer Chadli .

Mshambuliaji Harry Kane akiisawazishia Tottenham katika mchezo baina ya timu hizo uliopigwa siku ya mwaka mpya .

Mabao mengine ya Chelsea yalifungwa na Eden Hazard na John Terry . Mara ya mwisho kwa Chelsea kufungwa idadi kubwa ya mabao kwenye ligi kuu ya England  ilikuwa mwaka 1991 ambapo walifungwa na Nottingham Forest 7-0.

Arsenal wakiwa kwenye uwanja wa St Mary’s walikubali kipigo cha 2-0 mbele ya Southampton huku mabao yote mawili yakifungwa kutokana na makosa ya kizembe ya kipa Wojciech Szczesny. Wafungaji wa Saints kwenye mchezo huo walikuwa Sadio Mane na Dusan Tadic .

Dusan Tadic wa Southampton akifunga bao la pili kwenye mchezo dhidi ya Arsenal .

Katika michezo mingine Manchester City walishinda mchezo wao dhidi ya Sunderland kwa 3-2 , Liverpool na Leicester City wakitoka sare ya 2-2 , Newcastle na Burnley nao walifunga 3-3 huku West Ham United na West Brom wakiendeleza mfululizo wa sare baada ya kufungana 1-1 .

Matukio tofauti ya mchezo kati ya Manchester City na Sunderland ambao uliisha kwa City kushinda 3-2.

Matokeo haya yamewafanya Chelsea kupunguzwa kasi baada ya Manchester City kuwafikia kwa kutimiza pointi 46 huku Southampton wakiwapumulia Manchester United baada ya kupunguza tofauti ya pointi baina ya timu hizo ambayo kwa sasa itakuwa pointi moja .

Jumla ya mabao 34 yamefungwa kwenye michezo 10 iliyopigwa leo ukiwa wastani wa angalau mabao matatu kwenye kila mechi moja .

Stoke1-1Man Utd
Aston Villa0-0Crystal Palace
Hull2-0Everton
Liverpool2-2Leicester
Man City3-2Sunderland
Newcastle3-3Burnley
QPR1-1Swansea
Southampton2-0Arsenal
West Ham1-1West Brom
Tottenham5-3Chelsea

tiko tiko

Irene Mchokozi

Filed Under: MICHEZO